27 маусым — баспасөз, телевизия және радио күні!

Құрметті журналистер, бұқаралық ақпарат құралдарының қызметкерлері!

Сіздерді кәсіби мерекелеріңіз – баспасөз, телевидение және радио күнімен шын жүректен құттықтаймын!

Қазіргі кездегі экономикалық, саяси және қоғамдық үрдістердің қарқынды ырғағы біздің өмірімізде ақпараттың маңызды орын алатындығын айғақтайды. Сіздер арқылы қалың жұртшылық тың жаңалықтар мен қажетті ақпарат алады, білімін толықтыра түседі.

Сіздер қазіргі дәуірдің жылнамашысы ретінде барлық саланың дамуына, туған өлкені сүйіп, құрметтеуге, отансүйгіштікке тәрбиелеуге, біздің қоғамдағы адамгершілік бастауларды нық қалыптастыруға елеулі үлес қосып келесіздер. Кей жағдайда бұқаралық ақпарат құралдарының көмегімен көкейкесті әлеуметтік түйіндерге назар аударып, оларды бірігіп шешу арқылы оң нәтижелерге қол жеткіземіз.

Қымбатты достар!

Баспасөз адамның ақылы мен жүрегіне ерекше әсер етіп, оның сөзінің құдіреті кез келген қуатты қаруға да қарсы тұра алады. Сондықтан, үлкен жауапкершілік – Сөз, Қоғам және Ар жауапкершілігін арқалаған ақтөбелік майталман-журналистерді әрдайым мақтан тұтамыз.

Құрметті кәсіп – журналист мамандығын игеру әркімнің талайына берілмеген. Жоғары кәсіби шеберлікті игере отырып, үнемі дәуір үнімен тыныстау, қазіргідей қарыштап дамыған қоғамда халықтың қуанышы мен ауыртпалығын бөлісу, шынайы пікірлесу, оларды жаңа асулар мен шыңдарға тарту тек қана Сіздердің қолдарыңыздан келеді.

Бүгінгі мереке күні өз оқырмандарыңыз бен көрермендеріңіздің, тыңдаушыларыңыздың таңдаулысы болып қала берулеріңізді және шығармашылық табыс, кәсіптеріңізге сәттілік, мықты денсаулық тілеймін.

Облыс әкімі Елеусін САҒЫНДЫҚОВ.

Сіздерді кәсіби мерекелеріңіз — медицина қызметкерлері күнімен шын жүректен құттықтаймын!

Ежелгі ғасырлардан бері дәрігерлік қызмет асыл әрі адамгершілікті ту еткен кәсіп болып саналады. Қандай қиын сәттер мен ауыр жағдайларда да дәрігерлер мен мейірбикелер өз ісіне мұқият қарап, адам жанының арашашысы бола білді. Дәуір мен өркениет алмасып келсе де, дәрігерлердің Гиппократ антына адалдығы сол күйінде қалып отыр.

Елбасы өзінің Қазақстан халқына арнаған биылғы жылғы Жолдауында: «Халық денсаулығы ол — Қазақстанның өзінің стратегиялық мақсаттарына жетудегі табысының ажырамас құрамдас бөлігі», — деп атап көрсеткен болатын. Бұл ақиқатында солай. Бүгінде ұлттық құндылығымыз — баға жетпес адам өмірін сақтауда, олардың толыққанды күшпен еңбек етіп, шығармашылықпен айналысуында, сондай-ақ қоғамның белсенді мүшесі болып табыла білуінде сіздер атқаратын істердің маңызы зор.

Аса қадірлі медицина қызметкерлері!

Аса жауапты және шексіз берілген қызметтеріңізде Сіздер облыстың денсаулық сақтау саласының мерейін үстем етіп, жерлестеріміздің денсаулығын нығайтып, оны сақтауға зор үлес қосып келесіздер.

Ақ халатты абзал жандар ретінде әр науқастың жанына желеу болып, ауруға қарсы тұрып, саулығын қалыптастырып қана қоймай, адам бойына өмірлік күш-қуат беріп, жігерін жандырып келесіздер.

Сіздердің қай кезде де ғажайып туғыза білген мейірімді жүрегіңіз бен епті қолдарыңыз адамзаттың көкейіне сенімділік ұялатады.

Игілікті еңбектеріңіз, өз кәсіптеріңізге деген адалдықтарыңыз, азаматтардың денсаулығы жолында аянбай жасап отырған қызметтеріңіз үшін зор алғысымды білдіремін. Сіздерге және жақындарыңызға зор денсаулық, еңбекте жеміс тілеймін!

Бақытты болыңыздар! Төл мерекелеріңіз құтты болсын, құрметті медицина қызметкерлері!

Облыс әкімі Елеусін САҒЫНДЫҚОВ.

Қасиетті де ұлы мереке қарсаңында Сіздерді Жеңіс күнімен шын жүректен құттықтаймын!

Осыдан 65 жыл бұрын адамзат тарихында ең ауыр және қанды соғыстың соңғы оқтары атылды. Содан бері 1945 жылдың 9 мамыры жұртшылық жадында біздің халқымыздың ерлік үлгісі, мұқалмас қажырлығы мен мызғымастығының символы болып келеді.

Отан қорғаушылар жасаған ерліктер мәңгілік және уақыт ағысымен жоғалып кетпейді. Сол бір қаһарлы соғыс жылдары алыстаған сайын оның маңызын біз ерекше ұғына түсудеміз. Сондықтан да халық ұзақ күткен Ұлы Жеңісті жақындатуда майданда да, тылда да жанқиярлықпен күреске түскендердің барлығы айрықша құрметке ие, қаза тапқандардың рухына тағзым етеміз.

Аға ұрпақ алып берген Жеңіс бүгінгі күні де бізді жетістіктерге жігерлендіреді, жанымызға қуат береді, қиындықтарды жеңіп, алға ұмтылуымызға көмектеседі.

Біздің парызымыз — бұл алапат соғыстағы Жеңістің бізге қалай келгендігін ұғыну, қаза тапқандарды қадір тұтып, арамызда жүрген ардагерлерге ұдайы қамқорлық көрсету. Бүгінгі буын Жеңіс солдаттары алдында мәңгілік қарыздар, сондықтан да біз аймақтық ауқымда ардагерлерге жан-жақты әлеуметтік қолдау көрсету үшін барлық мүмкіндіктерді жасаудамыз.

Қымбатты ардагерлер!

Сіздер елімізді жаудан ерлікпен қорғай білдіңіздер. Ал бейбіт күндерде еліміз бен туған өлкеміздің игілігіне адал еңбек еттіңіздер. Қандай шаруаға да белсене қатыстыңыздар. Бүгінгі күні де біздің ортақ проблемаларымыздан шет қалмайсыздар, даңқты ерлік дәстүрлеріне адалдық пен патриотизм, қаһармандықтың лайықты үлгісі болып келесіздер. Ұлы Жеңіс үшін, өшпейтін Ерлік үшін шынайы көңілден шыққан алғысымызды қабыл алыңыздар.

Сіздерге шын көңілден денсаулық, тіршіліктің ұзақ та жарқын, алаңсыз күндерін, жан шуағын, жақын адамдарыңыздың қамқорлығы мен ықыласын тілеймін.

Қымбатты ақтөбеліктер! Сіздерге және отбасыларыңызға ізгіліктер мен игіліктер тілеймін! Табыстар мен сәттіліктер мол болсын!

Шын пейілді құрметпен,

облыс әкімі

Елеусін САҒЫНДЫҚОВ.

Сіздерді Отан қорғаушылар күні — жалпыхалықтық мерекемен, жігерлі адамдар және ерік күші иелері күнімен құттықтаймын!

Бұл күні біз Қарулы күштер қатарында қызмет еткендер мен сапта жүргендерге құрмет көрсетеміз. Мемлекеттің, қоғамның және әрбір қазақстандықтың қауіпсіздігін қорғаушылар мен өз еліне шексіз берілгендер де сондай ілтипатқа ие.

Бұл — ерекше мереке, біз бұл күні Ұлы Отан соғысы ардагерлері, ерлік пен батылдықтың өлшеусіз үлгісін көрсеткен барлық жерлестеріміз, Ауғанстанның отты жолдарымен өткен ержүрек жауынгерлер алдында тағзым етеміз.

Уақыт алмасады, ұрпақтар өзгереді, бірақ Отанға сүйіспеншілік, қажырлылық, ерлік, жауынгерлік рухымыз өзгеріссіз қалады. Ақтөбеліктер бүгінгі күні де өз Отанымыздың қорғаныстық қабілетін нығайтуға, Қазақстан халқының игілігі мен бейбітшілікті қорғауға лайықты үлесін қосуда.

Отан қорғаушылар күні өзінің бастапқы кәсіби белгіленімінен әлдеқашан биік дәрежеге көтеріліп, Отанды қадірлейтін, оның тарихын құрметтейтін, ерлік пен жауынгерлік күшке ие нағыз ерлердің мерекесіне айналды.

Нақ осы күн Отанға сүйіспеншілік іспетті адами құндылықтардың тұрақтылығы және өлшеусіздігі, оның мүдделерін қорғауға әзірлік, патриотизм мен ерліктің барлық көріністері туралы айғақтайды.

Қымбатты жерлестер!

Бүгінгі ерекше күні Сіздерге шын жүректен бақыт пен татулық, әрбір отбасына ізгіліктер мен игіліктер тілеймін. Ардагерлеріміздің дені сау болып, солдаттар мен офицерлеріміз табысты қызмет ете берсін. Ержүрек және жігерлі адамдардың бұл мерекесі әрдайым қуаныш пен бейбіт күн әкеле берсін!

Облыс әкімі Елеусін САҒЫНДЫҚОВ.

Құрметпен,
облыс Әкімі                    Е.Н.САҒЫНДЫҚОВ

Тәуелсіздікпен бірге қайта жаңғырған салт-дәстүрімізбен Наурыз мейрамы ғасырлар бұрынғы сән-салтанатымен біздің тұрмысымызға ендеп алды. Наурыз – жыл басы ғана емес, береке-бірліктің, ізгілік пен татулықтың, қайырымдылық пен кешірімділіктің, бауырмалдықтың мерекесі. Наурыздың қадір-қасиетін қазір біз жақсы білеміз. Ол – жаңа бастамалар, жаңа қуат және тың күштің бастауы, қайнар бұлағы.
Мемлекет басшысы Н.Ә.Назарбаевтың жүргізген сарабдал саясатының арқасында еліміз тұрақтылық пен бірліктің мекеніне айналып отыр. Үстіміздегі жылғы қаңтар Жолдауында Елбасы алдағы онжылдықтың маңызды міндеттерінің бірі – барлық қазақстандықтардың тұрмыс деңгейі мен сапасын жақсарту, әлеуметтік тұрақтылықты нығайту болып қала беретінін атап көрсетті.
Туған өңірімізде бұл сара міндеттерді жүзеге асырудың барлық алғы шарттары қалыптасқан. Әлемді дүрліктірген дағдарыс тұсында да біз жұмыссыздықтың өсімін шектеп қана қоймай, өңірде оның деңгейін төмендетуге, барлық елді мекендерде тұрғын үй-комуналдық жағдайды едәуір жақсартуға қол жеткіздік. Алған асуларымыз бен жеткен жетістіктерімізді еселеп өсірудің кемел істері биылғы жылы одан әрі жалғасын тауып келеді.

Қымбатты жерлестер!

Баршаларыңызға, әр отбасына шын жүректен, шынайы көңілмен бақ-береке тілеймін. Еліміз аман, жұртымыз тыныш болсын!
Нұрын төккен, шуағы мол Наурыз халқымызға – ынтымақ, елімізге – молшылық, әр шаңыраққа – бақыт пен шаттық әкелсін.
Ұлыс бақты болсын, төрт түлік ақты болсын!

Ізгі ниетпен,
облыс Әкімі                 Елеусін САҒЫНДЫҚОВ

Әр тоқсан сайын жарияланып жүрген әкімдер рейтингі өз өңірінің басшыларына атқарған істері бойынша баға беретін оқырмандарымызды кәдімгідей елең еткізетіні рас.

Ресми адамдар рейтингісінің жариялылығы батыстағы жұрттарда бұрыннан қалыптасқан, шенеуніктің өздеріне ғана емес, олар басқаратын әкімшіліктерге де тиімді баға берудің тәуір үлгісі. Қалай болғанда да, мұндай зерделеулер шенеуніктік аппаратты нақты бағалаудың кешенді құралы ретінде тұрақты жүргізілуі тиіс.

Қараша айының өлшемі мына жайды аңғартты. Дағдарысты кезең әкімдер корпусының мығымдығына сын көзбен қараумен бірге, олардың әлеуметтік проблемаларды шешу барысында ұйымдастырушылық, жан-жақтылық һәм басқарушылық қабілеттерін толық көрсетулеріне де мүмкіндік береді.

Ең әуелі, қалалықтардың пікірінше, бұл мүмкіндікті тиімді пайдалана білген, мығым іс иесі қабілетін танытқандар туралы әңгімелейік.

ДИНАМИКА. Жалпылай алғанда, соңғы екі айдағы (2009 жылдың қыркүйегінен қараша айына дейін) көрсеткіштер әкімдер корпусының іскерлік қабілеті төменге тарта беретіндігін байқатты.

Мысалға жүгінсек, тұтастай әкімдер корпусына берілген сенім  индексі қыркүйекте 920 балл болса, бұл цифр қараша айында 899-ға төмендеді. Әрине, жалғасып жатқан экономикалық дағдарыс жағдайында бұл түсінікті де.

Ал үшінші тоқсанның көрсеткіштері жарияланғалы бері жағдай біраз өзгерді. Лидерлер, орташалар мен артта қалғандар аса көп өзгеріске ұшырамағанымен, бұл топтың ішкі қимыл-үйлесімі кәдімгідей назар аударуға тұрарлық.

Рейтингте бірінші орынға шыққан Ақтөбе облысының әкімі Е.Сағындықов өз лидерлігін қараша айында да сақтап қалып отыр.

Әкімге облыс тұрғындарының 96 пайызы сенім көрсетіпті, бұл - қыркүйек айындағыдан 4 пайызға көп. Әкімге деген сенімнің өсуі, ең алдымен, әлеуметтік-экономикалық оңды өзгерістерді сезінген Ақтөбе тұрғындарының саны екі есеге көбеюіне байланысты болса керек - 31,4 пайыз.  Экономикалық тұрақтылықтың, респонденттердің бағалауынша, 3,5 пайызға нашарлауы да ақтөбеліктердің 18 пайызының қазақстандық қоғамның көңіл күйін көтеріңкі деп бағалауына кері әсер ете алған жоқ, ал бұл - еліміз бойынша ең жоғары көрсеткіш.

Механика-математика факультетінің түлегі Елеусін Сағындықов қазан айында бірқатар кездесулер өткізіп, оның ішінде Ақтөбе облысына келген республиканың бас прокуроры Қайрат Мәмимен заң саясаты тұжырымдамасын талқылады.

Алғы шептегі екінші орынның иесі де өзгерген жоқ, бұл орынды сақтап қалған Атырау облысының әкімі Б. Рысқалиев лидерлер сапында қалумен бірге, өз рейтингін 0,89-дан (қыркүйекте) 0,94-ке (қарашада) көтерудің мүмкіндігін тапты.

Бұл, ең алдымен, әкімнің дағдарысқа қарсы іс-қимылдарын жоғары деп бағалайтындардың 10 пайызға өсіп, 58,3 пайызға жетуіне байланысты екені даусыз. Қараша айында өгізді де өлтірмей, арбаны да сындырмай күн көруге болатынын айтқан қалалықтардың төмендеуімен (5,8 пайызға) бірге, шыдауға болатынын, бірақ бұл шыдамның келте екендігін айтатындар да 6 пайызға азайып, 10 пайыз болды.

Әңгіме болып отырған кезең аралығында облыс әкімі республикадағы ірі зауытты пайдалануға берді және өз аппаратында кадрлық ауыс-түйістер жасады. Көпір тұрғызу кезінде орын алған трагедиялық оқиға құрылысты мерзімінде аяқтауға уәде еткен Бергей Сәулебайұлының рейтингіне кері әсер еткен жоқ.

Үшінші орынға Шығыс Қазақстан облысының әкімі Б.Сапарбаев шықты.

Ол бұдан екі ай бұрын сенім рейтингінде 5-орында тұрған болатын. Экс-министрдің, қазіргі облыс әкімінің тұрақты түрде және аз уақыт ішінде бұлайша ілгері өрлеуін, әкімдердің жалпы тізімінде үшінші орынға табан тіреуін Бердібек Машбекұлының зор табыстары қатарына жатқызуға болады. Әкімнің дағдарысқа қарсы қимылдарын тиімді деп бағалайтын респонденттер саны 1,5 есеге көбейіп, 29,2 пайыз құрады. Өскеменде дағдарыстық проблемалар 2,5 есеге (12,4 пайыз) азайып, ал экономикалық жағдайдың тұрақтануы қыркүйек айындағы 14 пайыздан 23 пайызға көбейді.

Бұл кезең ішінде облыс әкімі Зырян ауданына жұмыс сапарымен барып, «Жол картасы» аясында жасалып жатқан шаруалармен танысты.

Төртінші орынға, өткен жолғы өлшемдегідей, Павлодар облысының әкімі Б.Сағынтаев шықты.

Ол қыркүйек айында «орташалар» тобынан сытылып шығып, қарашада жаңа деңгейге мығым орналасты. Бақытжан Әбдірұлының рейтингі онша жапа шеге қойған жоқ (қарашада - 0,76 пайыз, қыркүйекте - 0,86 пайыз). Ал сол аз жетпестік, сірә, ең алдымен, әкімге сенім білдіру деңгейінің 2 пайызға төмендеуінен (70,7 пайыз) және сенім көрсетуші қалалықтардың 3,6 пайызға азаюынан (9,3 пайыз) туындаса керек. Әкім рейтингі төмендеуінің себебін, павлодарлықтардың 15 пайызы көрсеткендей, экономикалық жағдайдың тұрақсыздығынан іздеген жөн шығар. Солай бола тұра, Павлодарда «бүлінген ештеңе жоқ, күн көруге болады» деп есептейтін қалалықтар тобы ел бойынша ең жоғары көрсеткішке ие - 59,3 пайыз.

Талданып отырған кезең аралығында Бақытжан Әбдірұлы азаматтарды жеке сұрақтары бойынша қабылдады және ҚР Ақпараттандыру және байланыс агенттігі жариялаған «Электрондық үкімет - 2009 бастамасын жүзеге асырудағы үздік мемлекеттік орган қайраткері» атағы үшін конкурста жеңімпаз атанды.

Бесінші орын. Алдыңғы топтағыларды қорытындылап тұрған Солтүстік Қазақстан облысының әкімі С.Біләлов кері секіріс жасап, қыркүйектегі үшінші орыннан қарашада бесінші орынға түсті.

Алдыңғы үш тоқсан бойы Серік Сұлтанғазыұлы рейтингтегі үздік өсудің мысалын көрсетумен болды: бірінші тоқсандағы 11-орыннан үшінші тоқсандағы 3-орынға дейін өрледі. Дегенмен қараша айының басында тұрғындар сенімі 10 пайызға азайып кетті (68 пайыз) және сенімсіздік көрсеткен қалалықтар саны екі есеге өсті - 11,7 пайыз.

Солтүстік Қазақстан облысында рекордтық мөлшерде дәнді дақылдар жиналып, бұл туралы облыс әкімі Мемлекет басшысына 2009 жылдың 14 қазанында мәлімдеп те үлгерген болатын. Әйтсе де қазан айының соңында аяқ астынан қар түсіп, тонналаған астық элеватор жетіспеуі салдарынан ашық аспанның астында қалды. Бұл жай да әкімнің рейтингі төмендеуіне әсер еткен болуы мүмкін.

Серік Сұлтанғазыұлы өз проблемаларын тез арада шешіп үлгеруі керек, әйтпесе одан 0,01 балл ғана кейін келе жатқан Қостанай облысының әкімі С.Кулагин алға шығып кетуі ғажап емес.

Алтыншы орында екінші тоқсанда «бас жүлдеге» ие болған Қостанай облысының әкімі С.Кулагин тұр.

Дегенмен өткен жолғы рейтингте әбден шалыс басқан (10-орын) Кулагин мырза айырылып қалған позицияларын қайтаруға бел шеше кірісіп, төрт орынға ілгері жылжыды. Өз рейтингін қыркүйектегі 0,46-дан қарашада 0,69-ға жақсартқан әкім өзіне сенім білдірушілер қатарын 6 пайызға көбейтті (56,5 пайыз). Қостанайлықтардың дағдарыс зардабын сезінуі екі есеге азайды - 6,5 және экономикалық жағдайдың тұрақтылығы он есе өсті (37 пайыз).

Сергей Витальевич әкімдер рейтингіндегі сүрінулерден соң, өз жұмыс белсенділігін арттыруға кіріскені байқалады. Азық-түлік пен ең бірінші қажет тауарлардың баға мөлшерін анықтау мақсатында Қостанай базарларын аралап шыққан әкім халықпен қоян-қолтық араласуының арқасында өз жағдайын біршама түзеп алды.

Жетінші орын, өткен тоқсандағыдай, бұл жолы да Маңғыстау облысының әкімі Қ.Көшербаевқа тиесілі болды.

Көшербаев мырзаның репутациясы көп жапа шеге қойған жоқ (0,02), себебі әкім өзіне сенетіндердің 12,6 пайызын жоғалтқанымен, өзіне сенім білдірмейтіндердің де мөлшерін 2 пайызға азайтты. Міне, осындай бір-біріне қарама-қарсы көріністер экономикалық жағдайды бағалауда да кезігеді: дағдарыстық проблемалардың 1,5 көбеюімен (12,3) бірге, тұрақтылық көрсеткіштері 3,5 есеге (41 пайыз) ұлғаюы байқалды, ал қосынды нәтижеде әлеуметтік-экономикалық саланың жақсарғанын айтатын респонденттер саны бір жарым есеге азайған.

Ивент-талдау нәтижелері көрсеткендей, бұл кезең әкім үшін оңайға соқпаған сияқты. Маңғыстау облысында жұмыс сапарымен болған ҚР Білім және ғылым министрі Ж.Түймебавпен, ҚР Премьер-Министрінің орынбасары С.Ахметовпен, АҚШ Энергетика министрінің орынбасары Д.Понеманмен, ҚР Қорғаныс министрі А.Жақсыбековпен, «Қазақстан темір жолы» АҚ президенті А.Мәминмен кездесулердің әкім рейтингіне еш ықпалы болған жоқ.

Сегізінші орынға үш сатыға ілгері жылжыған Оңтүстік Қазақстан олысының әкімі А.Мырзахметов шықты.

Асқар Исабекұлының қыркүйек айында күрт төмен құлдилауы Шымкент тұрғындарының облыстағы текетірес жағдайларға (жанар-жағар май жетіспеушілігі, май құю бекеттеріндегі көзбояушылық, т.б.) байланысты әлеуметтік-психологиялық көңіл күйлерінің төмендеуіне байланысты болып еді. Жағдайды түзеп, сонымен қатар сенім несиесін 1,5 есеге көбейтуге әкім қараша айында ғана қол жеткізді. Дегенмен бұл өсу баспалдағы өңірдегі әлеуметтік-экономикалық саладағы жағдайдың нашар екендігін көрсеткен респонденттердің саны екі есеге дейін өскені (23,7 пайыз) көрсетіліп жатқан тұста сенімсіздеу де сияқты. Экономикадағы жағдайды тұрақты деп бағалаушы респонденттер 10 пайызға азайса, оның есесіне экономикалық жағдайды дағдарысты халде деп бағалағандар 35,5 пайызға көбейіпті. «Шыдауға болатындығын, бірақ тым ұзаққа шабу мүмкін еместігін» айтқандар екі есеге азайып, «бұдан әрі шыдаудың мүмкін еместігін» респонденттердің 20,9 пайызы айтыпты.

Осылай сараптағанда,  әлеуметтік-экономикалық салада мақтанарлық көріністер аз болғандықтан, Асқар Исабекұлының рейтингісінің өсуін экономикалық фактормен түсіндіру қиын. Бәлкім, бұлайша өсіп кету себебін Оңтүстік Қазақстан облысына Премьер-Министр К.Мәсімовтің келуімен және облыс әкімінің қызметін жергілікті бұқаралық ақпарат құралдарының белсенді насихаттауымен түсіндірген жөн шығар.

Рейтингте тоғызыншы орынды өткен жолғы турнир таблицасында орташалардың алдын бермеген Алматы облысының әкімі С.Үмбетов иемденді.

Облыстың әлеуметтік-экономикалық өмірінде оң өзгерістер бар: тұрақтылық көрсеткіші 10 есеге өсті - 11 пайыз, бұған қоса қазіргі экономикалық жағдайды дағдарыстың тұзағында тұр деп бағалаушы рсепонденттер саны екі есеге азайған - 22 пайыз. «Жағдай сонша түңілерліктей емес, шыдауға болады» дейтіндер 3 пайызға өсіп, экономикадағы оң өзгерістерді байқағандардың мөлшері екі есеге көбейіпті.

Әйтсе де, Серік Әбікенұлының жолын кескен жай мынау: әкімге сенім көрсететіндер - 63 пайыз (-12 пайыз) болғанымен, оның есесіне сенім білдірмейтіндер - 17 пайыз (+5 пайыз).

Оныншы орын алған Жамбыл облысының әкімі Б.Жексембин - орташалардың соңы.

Егер Жамбыл облысының әкімі өткен жолы турнир таблицасындағы лидерлер мен артта жүргендерді қайта екшеудің арқасында бір саты ілгері жылжыса, бұл жолы қалалықтардың сенімінен шықпауы салдарынан бір позицияға төмендеп отыр.

Бөрібай Биқожаұлы рейтингілік есепте өзіне қала тұрғындарының 21,3 пайыздық сенімін жоғалтуына байланысты сенім несиесін 1,5 есеге азайтып алды. Респонденттердің 33 пайызы негізгі азық-түлік  бағаларының өскенін байқағаны, немесе олардың 27,5 пайызы ең бірінші қажетті тауарлардың қымбаттап кеткенін (қыркүйекте - 23 пайыз) аңғарғаны сияқты себептер қала тұрғындары сенімсіздігінің 4,4 есе өсуіне себепші болған сыңайлы.

Орташалар мен артта қалғандарды жалғастырып тұрған көпір іспетті он бірінші орын Қызылорда облысының әкімі Б.Қуандықовқа бұйырды.

Ол рейтингін 0,25-тен 0,34-ке көтеріп, екі саты жоғарылады. Өткен жыл бойы Болатбек Баянұлы 13-позцияны ұстанған еді. Алайда әкімдер таблицасындағы бұл тұрақтылық әкімнің жеке рейтингінің тұрақтылығы ретінде түсіндірілмейді, орташалар мен артта қалғандардың орын ауыстыруларының нәтижесі ғана. Солай болған күнде де, әкім рейтингінің үш есе өсуі тұрақтылықтың нышаны - 34,2 пайыз, ал дағдарыстық проблемалар 6,7 пайыз болды (бұрын - 10,8 пайыз).

Сондай-ақ қала тұрғындарының көңіл күйлерінде оң өзгерістер бар: әрбір екінші тұрғын «бүлінген ештеңе жоқтығын, өмір сүруге әбден болатындығын» айтады - 49,2 пайыз (қыркүйекте - 20,8 пайыз).

Он екінші орын Ақмола облысының әкімі А.Рауға тиесілі болды.

Ол үш тоқсан бойы өзі секілді орташалардың ортасынан шыға алмай жүр. Сенім несиесінің ең төмен деңгейге дейін (0,25) құлдырауы экономикалық тұрақтылықтың 3 есе кемуіне әкелді - қыркүйек айындағы 17 пайыз 5,8 пайызға түсіп қалды. Ал қалалықтардың қазіргі экономикалық жағдайды дағдарыс шегінде деп есептеуі 5 пайызға көбеюі себепті бұл көрсеткіш 20,8 пайызға келіп тірелді. Әкім рейтингінің құлауы, қалай болғанда да, оның дағдарысқа қарсы іс-қимылдарына жоғары баға берушілердің 5,8 пайыз ғана болуына байланысты екені шек келтірмейді, бұл қыркүйек айындағыдан 2 есе төмен.

Ал жағдайдың бұлай болуы егістік көлемі көбейтілгенмен, астық сақтау қоймалары мәселесі жеткілікті шешілмегендіктен, егін жинауға қатысты проблемаларға соғатын сияқты. Мына жай да ерекше алаңдатады, Көкшетау тұрғындары өздерінің көңіл күйлерінің түсіңкілігі жөнінен еліміз бойынша ең төменгі көрсеткішке ие - 3,3 пайыз (республика бойынша орташа көрсеткіш - 11,5).

Он үшінші орынға қараша айының рейтингісінде әкімдер корпусындағы ең танымал тұлға Астана қаласының әкімі И.Тасмағамбетов шықты.

Оның репутациялық деңгейі төртінші тоқсанда бір сатыға ғана төмендеді - 0,07 балл. Бұл әкімге сенетін респонденттер бөлігінің болмашы ғана азаюынан туындап отыр. Тұрақтылық көрсеткіші 2 еседен астам азайып, 17,7 пайыз құрағаны сенімділікті жоғалту ретінде бағалануы да мүмкін сияқты, бірақ экономикалық жағдайға баға берген астаналықтар дағдарыстық проблемалардың да 2,5 есеге азайғанын айтады - 3,3 пайыз.

Осының барлығы Астана тұрғындарының көңіл күйлері қалыпқа түсіп келе жатқандығын көрсетеді. «Шүкір, әзір тіршілік етуге әбден болады» дейтіндер қыркүйектегі 34,8 пайыздан 40 пайызға өсіпті.

Он төртінші орын артта қалушылар тобының тұрақты өкілі Батыс Қазақстан облысының әкімі Б.Ізмұхамбетовке бұйырды.

Жыл басынан бері есептегенде бұл әкім ие болған 14-орын оның жалпы рейтингтегі үздік көрсеткіші болып есептеледі (Қыркүйек айында - 16-орын). Рейтингтің аздап қана көтерілуінің себептері: қазіргі экономикалық жағдайды дағдарысты күйде деп есептеушілер 1,5 есеге азайған - 20 пайыз (қыркүйекте - 29 пайыз) және тұрақтылық көрсеткіштері 11 пайызға көбейген. (қарашада - 26,7 пайыз, қыркүйекте - 15,8 пайыз).

Әлеуметтік көрсеткіштердің назар аударарлық тұсы - қалалықтардың тұтынушылық-сатып алу қабілетінің төмендеуі және халықтың тұрмысы тәуірлері мен кедей топтарының арысындағы елеулі айырмашылық. Оңды тұрмыс кешіп жатқандар 2,5 пайызға азайса, кедейшілік шегінде тұрғандар 7,3 пайызға көбейген.

Он бесінші орын өткен тоқсандағы тәрізді оңтүстік астананың басшысы А.Есімовке тиді.

Қараша айында бұдан бұрынғы позициясын сақтай отырып, Ахметжан Смағұлұлы өз рейтингіне 0,15 балл қосты. Дегенмен бұл қадам әкімдер рейтингіндегі позицияны елеулі түрде жақсартуға жеткіліксіз болды. Әлеуметтік-экономикалық саланың 3,5 пайызға жақсарғанын (26,1 пайыз) және дағдарыс ызғарын сезінудің 9 пайызға азайғанын (20,6 пайыз) баяндайтын қосынды көрсеткіштердің өсуі Алматының қалабасына сенім білдірушілердің санын 1,4 есеге ұлғайтты (36,2 пайыз).

Сондай-ақ Алматы тұрғындарының тұтынушылық-сатып алу қабілеттерінде де өзгеріс болды: тәуір қамтамасыз етілген топтардың үлесі 6,5 пайызға азайса, сонымен қатар кедейшілік демін сезініп отырғандардың да азайғаны байқалады - 45,7 пайыз.

Он алтыншы орынға әкімдер рейтингінде соңғы екі тоқсан бойы төмендеп келе жатқан Қарағанды облысының әкімі Н.Нығматуллин табан тіреді.

Осылайша Нұрлан Зайруллаұлының репутациясы 2 позицияға шегініп кетті. Бұлай болуының басты себебі - оған сенім көрсететін қалалықтардың үлесі жыл бойы кеміп келеді - 28,3 пайыз (әр тоқсан сайын - 2,5 пайыз). Одан әріге барсақ, тұрақтылық көрсеткіштері 2,5 есеге азайып, 8,9 пайыз құрады, әлеуметтік-экономикалық саладағы оң өзгерістерді байқайтындардың саны да екі есеге азайып, 19,4 пайыз болды.

Экономикалық жағдайдың бұлайша қалыптасуы қалалықтардың көңіл күйлеріне де әсер ететіні даусыз. Қарағандылықтардың 27,8 пайызы ғана «жыланатын ештеңе жоқ, өмір сүруге болады» деген жауап берді, ал бұл қыркүйек айындағы көрсеткіштен 1,5 есе аз.

Міне, осылайша, әкімдер корпусының басым бөлігі жеке рейтингілік есепте де, әкімдердің жалпы рейтингінде де елеулі ұтылыстарға тап болды.

Бұл, расын айтқанда, республикамыздың көптеген қалаларындағы тұрғындар өмірінде әлеуметтік-экономикалық оң өзгерістер бар екендігі байқалып отырған кезеңдегі жағдай.

Жалпы алғанда, сауалнамаға жауап берген тұрғындардың басым бөлігі әкімдердің дағдарысқа қарсы іс-қимылдарына орташа баға береді. Әрине, әкімдер өз өңірінің проблемаларын оң шешуге тырысатындықтарын да естен шығармайды.

Мына жайды ерекше айта кеткен жөн, еңбек нарығын тұрақтандыру және аймақтық еңбекпен қамту мәселелерін шешуге бағытталған «Жол картасы» бағдарламасын жүзеге асыру әкімдерге ашушаң топтардың көңілін жайландырып, қоғамдық тәртіптің сақталуына  қауіп туғызатын жайлар мен жұмыссыздар санын азайтуға мол мүмкіндік берді. Дегенмен бұл бағдарлама да аяқталып келеді, демек, өңірдегі билік дағдарысқа қарсы жаңа шараларды ойластырып, жүзеге асыруды қолға алуы керек-ақ.

^{Саяси шешімдер институты.}

АСИП деректері бойынша әзірленді.

^{(*Рейтинг сауалнамасы жүргізілген уақытта Н.Нығматулин Қарағанды облысының әкімі болғанын еске саламыз.)}

Облыс әкімі Елеусін Сағындықов

Сіздерді кәсіби мерекелеріңізбен шын жүректен құттықтаймын!
Азаматтардың рухани дүниесі мен денінің саулығы — мемлекеттің басымдық беріп отырған маңызды міндеттерінің бірі. Дені сау ұлт қана Елбасының Қазақстан халқына Жолдауындағы қойылған міндеттерді жүзеге асыруға қабілетті болады.
Денсаулық сақтау ісін дамыту мен реформалаудың 2005-2010 жылдарға арналған мемлекеттік бағдарламасын жүзеге асыру нәтижесінде қолға алған стратегиялық бағыттардың дұрыс екендігіне көз жеткіздік: денсаулық сақтау саласына қаржы құйылып, медициналық нысандар салу, күрделі жөндеу жұмыстарын жүргізу жаңа қарқын алды.
Облысымызда тұрғындардың денсаулығы жақсарып, бала туу көрсеткіші артып келеді, өлім саны азайды. Ал медициналық көмектің өзі қол жететін әрі сапалы бола түсті.
Медицина қызметкерлерінің күні денсаулық сақтау саласында қызмет жасайтындардың ғана мерекесі емес, ол — бүкілхалықтық мейрам, өйткені, әр адам үшін оның денсаулығы мен өмірінен артық құндылық жоқ.
Орасан зор еңбектеріңіз құрметтің қандайына да лайық, сіздер атқарушы билік тарапынан да, тұрғындар тарапынан да үлкен алғысқа бөленіп келесіздер. Облыс әкімдігі денсаулық сақтау саласы мен осы салада жемісті еңбек етіп жүрген қызметкерлерге әрдайым қолдау көрсетіп келеді. Биыл денсаулық сақтау саласының қызметкерлері үшін облыстық әкімдік тарапынан сыйақы қоры 36 миллион теңге болатын «Шапағат» атты байқау жарияланды, оның нәтижесі медицина қызметкерлерінің кәсіби мерекесі күні шығарылады.
Игілікті еңбектеріңіз, өз кәсіптеріңізге деген адалдықтарыңыз, азаматтардың денсаулығы үшін аянбай жасап отырған қызметтеріңіз үшін зор алғысымды білдіремін. Сіздерге және жақындарыңызға зор денсаулық, еңбекте жеміс тілеймін!
Бақытты болыңыздар! Төл мерекелеріңіз құтты болсын, құрметті медицина қызметкерлері!

Ақтөбе облысының әкімі Елеусін Сағындықов

Интернетті қолданушылардан үкіметтік сайтқа облыс басшысына 10 сұрақ түсті. Бұл сауалдарға әкімнің берген жауабы оқырмандар үшін қызықты болады деп ойлаймыз.

Сұрақ:

- Президент Жолдауын жүзеге асыру жөнінде облыста қандай жоспарлар мен шаралар қаралуда?

Жауап:

- Облыстық мәслихаттың сессиясында облыстың экономика және қаржы секторын тұрақтандыру жөнінде 2009-2010 жылдарға арналған шаралар жасалып, жүзеге асырылуда. Облыстың әлеуметтік-экономикалық дамуын тұрақты қамтамасыз ету жоспары Мемлекет басшысының Қазақстан халқына Жолдауында белгіленген міндеттерді жүзеге асыруға, бірінші кезекте жұмыспен қамту және жұмыссыздықтың өсуіне жол бермеу, сондай-ақ дағдарыс кезінде тұрақты дамуға жағдай жасауға бағытталған.

Жоспар үш бағыт: өңірлік еңбекпен қамту және кадрларды қайта даярлау, агроөнеркәсіптік кешенді жедел дамыту, «Қазақстанның 30 корпоративті көшбасшысы» бағдарламасының екінші бағытын жүзеге асыру, инфрақұрылымдық және индустриялық жобаларды іске асыру бойынша жүргізілуде.

Өңірлік еңбекпен қамтамасыз ету және облыстағы кадрларды «Жол картасы» бағыты бойынша даярлау стратегиясын жүзеге асыруға 12 735,0 миллион теңге, оның ішінде республикалық бюджет трансфертінен 10 573,0 миллион теңге, жергілікті бюджеттен 2161,1 миллион теңге бөлінді. Биылғы жылдың 30 мамырына тендер бойынша жарияланған 241 жобаның 35-і бойынша келісім-шарттар жасалып, жүзеге асыру басталды.

Үстіміздегі жылы агроөнеркәсіптік кешенді дамытуға 6,4 миллиард теңге жұмсау қаралуда.

Сонымен қатар 1,6 миллиард АҚШ долларын құрайтын, 5 мың жаңа жұмыс орнының ашылуына мүмкіндік беретін 54 индустриялық-инновациялық жобаны жүзеге асыру жоспарлануда.

Қабылданған жоспарлардың орындалуын дағдарысқа қарсы шараларды жүзеге асыруды және халықты жұмыспен қамтамасыз етуді бақылау жөніндегі комиссия бақылайтын болады.

Сұрақ:

- Бұрын, қаржы дағдарысына дейін облыстың инвестициялық тартымдылығы туралы айттыңыз. Бұл туралы не айтасыз, қазіргі кезде инвесторлар бар ма, қандай жобалар жүзеге аспақшы?

Жауап:

- Біздің облысымызға инвесторлардың қызығушылығы бәсеңдеген жоқ. Мұны үстіміздегі жылдың 4 айындағы көрсеткіштер дәлелдей алады. Мәселен, негізгі капиталға құйылған инвестиция 63,8 миллиард теңгені құрады, бұл өткен жылдың осы кезеңімен салыстырғанда 14 пайызға жоғары. Бұл көрсеткіш жоғары болып табылады және республика бойынша тартылған инвестицияның жалпы көлемінің 6,5 пайызын құрайды. Биыл 282 жоба бойынша, оның ішінде облыстың индустриялық-инновациялық даму Стратегиясы жөніндегі 54 жобасы жүргізілуде. Бюджеттік инвестицияның ұлғаюы есебінен 220 жоба іске асырылуда.

Сұрақ:

- Бұрынғы жылдардағыдай ауылдың инфрақұрылымын дамыту жөніндегі жұмысты жалғастыруға мүмкіндік бар ма?

Жауап:

- Биылғы жылы ауылдық аумақтарды дамыту бағдарламасы аясында ауылдардағы басталған әлеуметтік және инфрақұрылымдық нысандар құрылысы жалғастырылатын болады.

Ауылдық аумақтарды дамыту жөніндегі бағдарлама бойынша биылғы жылға қаралған 3694,7 миллион теңге толық көлемде сақталатын болады.

Бұл қаржыға 12 білім беру, 12 денсаулық сақтау нысандары құрылысы жалғастырылып, 10 ауылдық елді мекеннің сумен жабдықтау жүйелерінің құрылысы мен қайта жарақтау жұмыстары жүргізіледі. Ырғыз өзені арқылы өтетін көпір мен Қобда ауданындағы Абат-Байтақ кесенесіне баратын көпір құрылысы жүзеге асырылады. Байғанин, Қобда, Алға ауданының Тамды-Павловка-Қайнар селоларына баратын магистральдық газ құбырларының, сондай-ақ жоғары қысымдағы үш елді мекеннен өтетін (Ақтөбе қаласының Красносельское, Хромтау ауданының Сарысай, Шалқар ауданының Аққайтым ауылдары) құрылыстар жүргізіледі.

Жоғарыда аталған нысандардың ішінде биылғы жылы 6 мектеп, 3 балабақша, мектеп-интернат, 2 дәрігерлік амбулатория, 10 дәрігерлік пункт, 3 елді мекенге газ жүргізу, 2 көпірді қайта жобалау, сонымен қатар 10 елді мекенге су құбыры желісін жөндеу жұмыстары аяқталатын болады. Бұдан басқа «Жол картасы» шараларын жүзеге асыруға 1756,4 млн. теңге бөлінді, ол мектептерді, ауруханаларды, басқа да әлеуметтік объектілерді жөндеуге, сондай-ақ селолық елді мекендердің автомобиль жолдары құрылысы мен қайта жаңғыртуға және жөндеуге жіберілді.

Сұрақ:

- «Жол картасы» бойынша селолық клубтарды жөндеу қарастырылған ба?

Жауап:

- «Жол картасының» бесінші бағыты бойынша - поселкелерде, ауылдарда (селоларда), ауылдық (селолық) округтерде басымдықтағы әлеуметтік жобаларды қаржыландыру - облыс бойынша селолардың 28 мәдениет объектісін күрделі жөндеуге - 409,8 мың теңге, оның ішінде республикалық бюджеттен - 360,4 мың теңге, жергілікті бюджеттен 49,4 мың теңге қарастырылды. 880 адамды жұмыспен қамту жоспарлануда.

Сұрақ:

- Қазақ тілін үйрету және өзге ұлт өкілдеріне өз ана тілін үйрету жұмыстары қаншалықты жүзеге асып жатыр?

Жауап:

- 2007 жылғы 12 қаңтардағы облыс әкімдігінің №6 қаулысымен тілдерді дамыту жөніндегі облыстық басқарма жанынан «Тілдерді оқыту жөніндегі орталығы» мемлекеттік коммуналдық қазыналық кәсіпорны құрылды. Орталықта мемлекеттік қызметшілер үшін оқыту ақысыз жүргізіледі. Қазіргі таңда 3 деңгейлік курстардағы 626 тыңдаушының 78 пайызы - мемлекеттік қызметшілер, 39 пайызы - өзге ұлт өкілдері. Орталықтағы 6 мультимедиалық кабинет ұйымдастыру техникасымен, электрондық оқулықтар және оқыту бағдарламаларымен қамтамасыз етілген. Сондай-ақ, облыстағы 7 ұлттық-мәдени орталықтың жанынан құрылған жексенбілік мектептерде өзге ұлт өкілдеріне өздерінің ана тілдері - украин, неміс, поляк, татар, корей, әзірбайжан, орыс тілдерімен қатар мемлекеттік тілді де үйрету қолға алынды.

Сұрақ:

- Сіз өз жұмысыңызда облыстағы әлеуметтік-экономикалық ахуал туралы қоғамдық пікірді ескересіз бе?

Жауап:

- Облыстағы қоғамдық-саяси жағдайды тұрақты талдау үшін Ақтөбе облысында әлеуметтік зерттеулер жүргізу бойынша әлеуметтік тапсырысты орындайтын зерттеу және талдау құрылымдарымен тығыз ынтымақтастық практикасы жолға қойылған. Мүмкін болатын тәуекелдер мен тұрақтылыққа қауіп реттерін анықтау үшін жаппай әлеуметтік сұрау салу әдістерінің бірі - қоғамдық-саяси ахуал мониторингі қолданылады.

Облыс тұрғындарының әлеуметтік көңіл-күйлерін анықтау, олардың билік шешімдерін қабылдауын қадағалау және әр түрлі өзекті мәселелер бойынша бағалау ұстанымдары мен пікірлерді, ағымдағы артықшылықтарды айқындау үшін бірқатар проблемалар бойынша мониторинг жүйесі пайдаланылады. Біріншіден, бұл - экономикалық жағдайды, облыс тұрғындарының қоғамдық және жеке проблемалардың өзектілігі дәрежесін бағалауға бағытталған зерттеулер. Екіншіден, бұл  - мемлекеттік органдардың қызметін, облыс тұрғындарының билік органдарына сенім деңгейін, облыс тұрғындарының саяси реформаларға, саяси партиялар мен оппозицияларға көзқарастарын бағалауға бағытталған зерттеулер.

Әлеуметтік зерттеулер нәтижелері қоғамдағы шиеленісті ахуалдар деңгейін анықтауға, оның көтерілуінің орын алған және мүмкін болатын себептерін, тән сипаттарын айқындауға және тұрғындар арасында мемлекеттік билік органдарының іс-қимылына, сондай-ақ жүргізіліп жатқан саяси реформалар мен қазіргі заманғы саяси өмір ақиқатына  оң көзқарас пен түсіністікті орнықтыруға бағытталған саясатты қалыптастыруға мүмкіндік береді. Зерттеулер нәтижелері бойынша талдамалы есептер ай сайын облыстық газеттерде жарияланып тұрады.

Сұрақ:

- Облыста машина-трактор паркін жаңарту және көктемгі далалық жұмыстарды жанар-жағармаймен қамтамасыз ету бойынша қандай жұмыстар жүргізілуде?

Жауап:

- Шынында да, машина-трактор паркін жаңарту облыстың барлық агроөнеркәсіп кешенін тұрақты және ілгерілі дамытуды қамтамасыз ететін басты міндеттердің бірі болып табылады. Бұл проблемаға айрықша көңіл бөлінуде - соңғы үш жылда осы мақсатқа 4,5 млрд. теңгеден астам қаржы бағытталды. Биылғы жылғы 5 айдың ішінде ғана машина-трактор паркін жаңартуға 2,2 млрд. теңге бөлінді. Мұнда ең маңыздысы, Батыс еуропалық елдердің сапалы жоғары өнімділіктегі техникасын алуға бағыт ұсталынды. Мысалы, соңғы жылдары тәулігіне 24 мың га-дан астам алқапқа дәнді дақылдар себуге қабілетті 93 жоғары өнімділіктегі егіс кешені алынды. Бұл жұмыстар, сөз жоқ, ауқымды шығындарды қажет етеді, бірақ біз оларды шешу жолдарын іздестіретін боламыз.

Көктемгі далалық жұмыстарды жанар-жағармаймен қамтамасыз етуге келетін болсақ, бұған қатысты барлық мәселелер толық көлемде шешілді. Несие ресурстарын, әсіресе, ұсақ ауыл шаруашылығы құрылымдары үшін алу қиындығын ескере отырып, 240,0 млн. теңге мөлшерінде қаржы бөлінді, ол ауыл шаруашылығы құрылымдарына егін жинауды аяқтағаннан кейін бірте-бірте есептесумен тауарлы несие түрінде берілетін дизель отынын 50 пайыздық арзандатуға жұмсалды.

Сұрақ:

- Біздің қаламызда емхана тұрғызылады деп естігенмін. Айтыңызшы, дағдарысқа байланысты бұл шешімді орындау тоқтатылған жоқ па?

Жауап:

- Бірде-бір әлеуметтік жоба тоқтатылған жоқ. Президенттің «100 мектеп, 100 аурухана» бағдарламасы бойынша Ақтөбе облысында 5 нысанның құрылысын жүргізу көзделген. Бұл - 300 төсектік Ойыл аудандық орталық ауруханасы, 200 төсектік балалар ауруханасы, Тұрғындар қалашығы мен Әуе қалашығы аудандарында ауысымында 500 адамды қабылдайтын емханалар.

Ойыл аудандық орталық ауруханасы 2008 жылдың желтоқсан айында пайдалануға берілді, Тұрғындар қалашығы ауданындағы емхананы 2009 жылдың тамыз айында, ал Әуе қалашығындағы емхананы 2009 жылдың желтоқсан айында тапсыру жоспарланған.

Сұрақ:

- Мемлекет басшысының агроөндірістік кешенді өндірістік негізге көшіру, ауыстыру, заманауи өндірістік технологияларды игеруге байланысты тапсырмалары қалай орындалып жатыр?

Жауап:

- Облыс тұрғындарының арзан, бәсекеге қабілетті өнімге сұранысын қанағаттандыру мәселесін өндірістің заманауи технологиясын игермей, агроөндірістік кешенді өндірістік кешенге көшірмей шешу мүмкін емес. Осыған байланысты Алға ауданының аумағында «Париж коммунасы-ХХІ» ЖШС жылына 2500 тонна шошқа етін өндіретін және тереңдетіп қайта өңдейтін Бестамақ мал шаруашылығы кешені сияқты үлкен нысанының құрылысын бастады. Бұл облыс тұрғындарының етке деген сұранысын толық жауып қана қоймай, аталған өнімді экспорттауға мүмкіндік туғызады.

Импорт ауыстыру шеңберінде «Көктас-Ақтөбе» АҚ тиесілі «Аққұс» құс фабрикасы қайта жарақталып, құрылысы жүргізіліп жатыр. Биылдың өзінде құс фабрикасы 1200 тонна құс етін өндіреді. Болашақта өндіріс көлемін жылына 600 тоннаға дейін жеткізуге мүмкіндік бар. Сонымен қатар Хромтау ауданында 1 миллиард теңгеден артық инвестицияны қажет ететін «Ақжар и К» ЖШС бройлер тауығын өндіретін құс фабрикасы құрылысы жобасы шешілу алдында. «Рамазан» ЖШС құс фабрикасын да қайта жарақтандыру жұмыстары аяқталуға жақын және оның қорытындысында жұмыртқа өндіру 1,5 есеге өседі. Бұл облыс тұрғындарының жұмыртқаға сұранысын толық көлемде жауып қана қоймай, көрші облыстарға шығаруға мүмкіндік береді.

Мәртөк ауданында инвестиция көлемі 4 миллиард теңгеден асатын екі ірі тауарлы сүт  фермасының құрылысы басталады. «Изет» ЖШС-ның жылына 1600 тонна көкөніс өнімдерін өндіретін ірі жылыжай кешенінің құрылысы жүргізіліп жатыр. Бұл нысандар пайдалануға берілгенде,  облыс тұрғындарын негізгі азық-түлік өнімдерімен қамтамасыз ету жақсара түседі.

Сұрақ:

- Біздің облыста жұмыс жасап тұрған оқу орындарының негізінде қанша маманды қайта даярлау көзделген?

Жауап:

- Облыстың 15 кәсіптік лицейі мен 2 колледжі базасында «Жол картасы» бойынша жыл ішінде 2171 адамды дайындықтан және қайта даярлықтан өткізу жоспарлануда. Қысқа мерзімді даярлық бойынша мамандықтар тізімі тұрақты түрде ұлғаюда және еңбек рыногы сұранысын ескерумен жаңартылуда. Оқу орындарының материалдық базасы курстық даярлық бойынша оқытуды жүргізуге мүмкіндік береді. Қазіргі уақытта кәсіптік лицейлерде газ-электр дәнекерлеушісі, шатыршы, тас қалаушы, моторист, ағаш шебері, әр түрлі санаттағы жүргізушілер, аспаз, автомобиль көтергішінің машинисі, экскаватор машинисі, электрик, түзетуші, тракторшы-машинист, КИПиА слесары, т.б. барлығы 32 мамандық бойынша мамандар даярлау жүргізіледі. Мамыр айында техникалық және кәсіптік білім беру оқу орындарында «Жол картасы» аясында 330 адам даярлықтан өтуді бастады, оның ішінде 15 адам жұмыс берушілер қаржысы есебінен оқуда («Қазхром» ТҰК» АҚ филиалы «Дөң» тау-кен байыту комбинаты).

http://www.aktobegazeti.kz/?p=1899